Oʼzbekiston Respublikasi Konstitutsiyasining 35-moddasiga asosan har bir shaxs bevosita oʼzi va boshqalar bilan birgalikda vakolatli davlat organlariga, muassasalariga yoki xalq vakillariga ariza, taklif va shikoyatlar bilan murojaat qilish huquqiga ega.
Oʼzbekiston Respublikasi Prezidenti Sh.Mirziyoevning 2017 yil 22 dekabrь kuni Oliy Majlisga Murojaatnomasida qonunlar muhokamasiga keng xalq ommasini jalb qilish, buning uchun zamonaviy axborot-kommunikatsiya texnologiyalarini joriy etish, jumladan, Internet tarmogʼida maxsus “maydon”lar yaratishi zarurligini taʼkidlab oʼtgan edilar.
Yuqoridagilardan kelib chiqib Oʼzbekiston Respublikasi Prezidentining 2018 yil 22 yanvardagi PF–5308-son Qarori bilan tasdiqlangan Davlat dasturining 34-bandida “Mening fikrim” maxsus veb-portali orqali Oʼzbekiston Respublikasi Oliy Majlisi palatalari, xalq deputatlari viloyat, tuman va shahar Kengashlariga elektron jamoaviy murojaat qilish tartibini joriy etish belgilangan.
“Mening fikrim” veb-portali mamlakatimizda fuqarolarning jamiyat va davlat ishlarini boshqarishda ishtirok etish imkoniyatlarini kengaytirish, davlat hokimiyati vakillik organlari faoliyatining ochiqligi, qabul qilinayotgan qonunlarning hayotiy va samarali boʼlishini taʼminlash maqsadida yaratildi.
Mazkur veb-portal orqali Siz davlat va jamiyat ahamiyatiga molik muhim masalalar yuzasidan qonunchilikka takliflaringizni elektron jamoaviy murojaat shaklida yuborishingiz mumkin.
Yuborilgan elektron jamoaviy murojaat tizim moderatori – Oʼzbekiston Respublikasi Oliy Majlisi huzuridagi Qonunchilik muammolari va parlament tadqiqotlari instituti tomonidan ekspertizadan oʼtkazilgandan soʼng veb-portalda eʼlon qilinadi.
Sizning elektron jamoaviy murojaatingiz jamoatchilik tomonidan yetarli miqdorda qoʼllab-quvvatlanganda u tegishliligi boʼyicha Oliy Majlis palatalari yoki xalq deputatlari mahalliy Kengashi tomonidan koʼrib chiqiladi.
Ushbu veb-portal Davlat axborot tizimlarini yaratish va qoʼllab-quvvatlash boʼyicha Yagona integrator "UZINFOCOM” – masʼuliyati cheklangan jamiyati tomonidan ishlab chiqildi.